Figli di Annibale

Silvio Orlando beda jifqagħni bid-daħk meta kont ili li għalaqt u qbiżt it-tmintax-il sena. Biex bdejt nagħraf l-ironija ħafifa tiegħu kelli bżonn naqra ftit aktar filosofija. Mhux għax huwa bniedem ikkumplikat wisq. Attur qsajjar, minn Napli, li ftit li xejn ituh partijiet fejn ikun sinjur, qawwi, jew poplari. Tarah spiss fil-partijiet tat-tellief imħarbat u paranojku, vittma tas-sitwazzjoni, kemm jekk qed jipprova jdawwar lira jew jgħallem lil bintu li dak iż-żagħżugħ m'għandhiex xi tridu. Jew tal-Kommunist, jew tal-meridionale f'dinja li qisha akkwarju kollu ħut kbir minn Milan.

F'Figli di Annibale, Domenico (Orlando) ikun raġel b'xagħru twil ħafna li dejjem idur bil-mutur u b'ġakketta tas-suldati. Jgħix f'Turin iżda jidher u jinstema' li l-għeruq tiegħu jinsabu fin-nofsinhar ta' l-Italja, u biex żgur ma jkollkomx sorpriżi, m'għandux xogħol.

Darba fettillu imur jisraq bank. Jieħu bħala ostaġġ lil Tommaso (Diego Abandantuono) u jipprova jaħrab lejn l-iSvizzera. Iżda Tommaso jinsab imdejjaq daqsu, għax hu u martu ma jinħamlux. Ir-relazzjoni bejn Tommaso u Domenico malajr tinbidel. Tommaso jikkonvinċih biex jaħarbu lejn in-nofsinhar, lejn l-Eġittu, flimkien mat-tifla ta' Tommaso.

* * *

Dalgħodu qomt ħażin, bħas-soltu. Riħ ivenven u xita ttektek mal-ħġieġa tal-gallarija tiegħi. Naħseb ġejja ġurnata oħra minn dawk. Qed inħares fil-mera mingħajr ma nara xejn. Qed indawwar l-ingravata ma' għonqi, nagħmel dik il-logħba b'subgħajja biex nagħmel l-għoqda, u fl-aħħar nissikkaha xi ftit, kemm kemm iddejjaqli l-gerżuma.

Flok il-qerda stunata ta' Liam Gallagher (fi żmien kien ikun hemm il-kariżma ta' Dave Grohl) għaddejja fil-kamra tiegħi, weħidha u trankwilla, il-gitarra elettrika daqsxejn skurdata ta' Ali Farka Toure. Għal bosta nies oħra kien l-ekwivalenti Afrikan ta' John Lee Hooker, il-bluesman tal-Mali.

Forsi għax ilbieraħ kont qed nara t-Tazza tan-Nazzjonijiet Afrikani, kien hemm l-Angola kontra l-Afrika t'Isfel. Qomt bl-aptit li nisma lil Toure (li miet fl-2006) u dak il-leħen donnu jgedwet bl-ilsna ta' kontinent kbir, maqsum, miġġieled, korrott, mejjet bil-ġuħ iżda uniku u affaxxinanti fl-istess waqt.

* * *

Rajthom dalgħodu wkoll, it-tfal ta' Annibale, mexjin fil-ksieħ ta' Jannar, bir-riħ forza tmienja jimbuttahom 'il quddiem kważi jrid iwaqqagħhom għal wiċċhom, il-bard li jqabbadhom bruda minkejja li l-istonku vojt. Is-snien iċekċku u l-għadam muġugħa. Mexjin minjaf fejn, lejn xi ġurnata jġorru briks u travi u li fi tmiemha l-imgħallem itihom lira s-siegħa. Issa mqar itihom ewro s-siegħa biex naqtgħu għad-dritt. Jekk iweġġgħu problema tagħhom.

U rajt ieħor jitla' u jinżel minn fuq l-iscammel, jiġri jiġbor iż-żibel u jarmih f'dik il-magna kbira li tqatta' dak kollu li narmu aħna. Żelqitlu borża ma' l-art, b'xorti tajba ma nfetħitx u ta' ġo fiha ma nfirixx mat-triq kollha. Wasal leħen aħrax minn mal-ġenb tal-magna, bil-Malti mqit, sidu liebes flokk ta' taħt li xi darba kien abjad u bermuda griż. Minn dik iż-żaqq ħoxna u mdendla l-ħdura telgħet għas-sider, ħarġet mill-esofagu, lura għall-ħalq, ħarġet fit-triq u minkejja l-istorbju nstemgħet minn ħafna widnejn.

Xiż-żo** qed tagħmel! Fo** ommok u min ġibdek, u min ġabek hawn, iċċaqlaq ja mejjet bil-ġuħ...

Imn'Alla l-Afrikano ma fehemx ilsien pajjiżna. Iddispjaċieni għalih, dak il-bniedem li qasam kontinent ifittex l-Italja u jsib lil Malta. U daħku bih dawk li ħadulu flusu fuq il-kosta tal-Libja, lilu u lil ħutu li rnexxielhom jgħixu aktar mill-għaxar snin. Għax forsi l-oħrajn qatlithom xi bajjunetta, jew xi mannara ta' suldat impjegat ta' dittatur, jew mietu b'xi marda jew saħansitra bil-ġuħ u bil-għatx.

Għax f'pajjiżhom m'hemmx sptarijiet b'xejn, m'hemmx il-Mater Dei, hemm ministri u gvernijiet lagħqa ta' l-Ingilterra, Franza, Israel u l-Amerka, jixtru l-armi ta' għaxar snin ilu biex jagħtuhom lill-milizjani, u jitbissmu waqt li jippriedkaw biex ħadd ma jibqa' lura. Hemm mostri kbar u żgħar fix-xorta ta' Idi Amin, immexxija mill-għarus il-ġdid ta' Carla Bruni u mix-xiħa li għandha wiċċha fuq ħafna, wisq sterlini.

* * *

Fit-tmiem ta' Figli di Annibale, Tommaso, Domenico u bintu jistembħu f'nofs iċ-ċpar u fil-bogħod jaraw art. M'hijiex l-Amerika li qatt ma fittxew.

Kien qed ibexbex fit-tramuntana ta' l-Afrika.

Minn faċċata tagħhom bdiet ġejja dgħajsa mimlija nies. Taħsibha ser tegħleb fuq ġenb u tegħreq b'kollox. Tommaso u Domenico bdew jgħajtulhom. Għinuna, aħna Taljani. Dawk ta' fuq id-dgħajsa baqgħu jħarsu lejhom, b'wiċċhom għajjien u bil-kurżita tberren f'għajnejhom. Ħalqhom m'għamel ebda ċaqlieqa, baqgħu jħarsu lejn dawk it-Taljani mingħajr ma setgħu itarrfulhom id-dieqa li kellhom ġo fihom u dak li kienu għadhom kif għaddew minnu.

Id-dgħajsa ta' Tommaso u Domenico baqgħet titħarrek bil-mod, riesqa lejn ħolma li minnhom għadha kif ħarbet dgħajsa oħra mimlija nies donnhom fi ħmar il-lejl.

* * *

Il-Ħadd li għadda kienet ġurnata sabiħa. U allura qam fuq tiegħu it-Tabib. Għandu partit li jiftaħar kemm huma għal qalbu l-valuri tradizzjonali Maltin, bħall-kaċċa, il-pastizzi, u l-karrozzini f'nofs it-toroq. Wara ħamsa u għoxrin sena ta' xogħol tradizzjonali Malti, bħalma hija karita' bil-ħlas kif għallimna missierna San Pawl, issa għandu uffiċċju b'irħama kbira fix-xatt tas-Sliema.

Qed naħlu wisq flus fuq it-tfal ta' Annibale. Nibagħtuhom jaħdmu fis-servizzi u nħallu lil Maltin bla xogħol li jirreġistraw jixorbu l-Hopleaf u jpejpu d-Du Maurier fil-każini.

Lit-tfal ta' Annibale irriduhom iġemmgħu l-flus u jużawhom biex imorru lura f'pajjiżhom u jerġgħu jibdew ħajjithom, imqar waqt li madwarhom għaddejja gwerra ċivili u qed jinfirex virus ġdid jismu Ebola II (Beta Release). U l-flus li niffrankaw imqar nagħtuhom lill-iżviluppaturi biex jibnu aktar imperi tal-konkos li fihom mhu ser imur joqgħod ħadd.

U jekk xi Ewrofilu lagħqa ta' Verheugen għandu xi oġġezzjoni, intellgħuhom kollha Brussels u jgħidulna huma x'inhi s-soluzzjoni. Basta nista' nibqa mmur għall-kaċċa fir-rebbiegħa.

Għax hu ma jibżax, tafux. U l-għoxrin ruħ li kien hemm quddiemu, bogħod nofs metru minn xulxin, jew biex jidhru ħafna jew biex ma jinxtammx l-għaraq tal-ħadd filgħodu wara l-passiġġata bil-kelb, qagħdu jisimgħuh imsaħħrin, u hu jitħaddet u jfiemhom b'dahru ċkejken imdawwar lejn il-bini jaqa' biċċiet li hemm fil-bokka ta' l-infern, li issa ċċaqalqet u ġiet il-Marsa.

Nawsja

nausea n. dardir, nawsja, ħass ta' diżgust jew dardir. - Concise Maltese English English Maltese Dictionary, Joseph Aquilina, Midsea Books Ltd

* * *

Għandi n-nawsja għax qed jistaqsuni ħafna mistoqsijiet li m'għandix tweġiba għalihom, mhux ser ikolli, u jekk ikolli tant ninsab imdardar li jekk niftaħ ħalqi ma jkunx biex toħroġ it-tweġiba.

Għandi n-nawsja u qed nirremetti ftit ħsibijiet hawnhekk.

Għandi n-nawsja għax ħafna, wisq, nies jaħsbu li dak li nikteb f'dan il-blogg huwa kollu minnu. Taħsbu li ser niftaħ l-ixkejjer ta' qalbi daqshekk malajr quddiem kulħadd? Dan il-blogg huwa rokna ċkejkna fejn nista' inżejjen ftit minn ħajti bil-kitba, imqar fittizja. Ħaddieħor jaf ipinġi, ikanta, jistona, idoqq jew ixandar. Jien ħriġt b'idejja kbar wsiq biex inpitter. Iżda pinna d-daqs tagħhom sibt.

Għandi n-nawsja għax min hu ċajtier dejjem għoġobni iżda min hu buffu qatt ma laqatni.

Għandi n-nawsja għax min hu buffu qatt ma laqatni iżda min hu giddieb liebes ta' ċajtier xi darba jinqabad.

Għandi n-nawsja minħabba l-messaġġ ta' La Barokka u għal darba, irrid u ma rridx, spiċċajt naqbel mal-Boċċa.

Għax, ngħid jien, biex twieġeb persuna waħda ma tridx iddaħħal kategorija sħiħa ta' nies u tibgħatilhom email mingħajr ma qatt għamlulek xejn. Taf int, jekk qed tipprova turi kemm inti superjuri, m'għandikx għalfejn tiddeffes fil-posta elettronika tagħna. U prosit tal-messaġġ. Qisu taħlita bejn Goebbels u l-Apokalissi.

Għandi wkoll xi ftit nawsja għax La Barokka setgħet użat isimha ta' veru. Tgħodd għal I.M. Beck ukoll, hux. Allura kieku jien insir Il Postmoderno jew Il Fiore di Pietra. Jew Il Nauseato.

Għandi n-nawsja għax Fredu Sant ma jistax jagħmel operazzjoni fil-kwiet mingħajr ma jinqala' dak kollu li jieħdu prekawzjoni sabiex ma jinqalax. Ma jinteressanix inkun naf x'kellu, u lanqas jinteressani x'kellu Fenech Adami xi ftit snin ilu anqas. U jinteressawni, marġinalment, l-artikli kollha li qed jitfaċċaw dwar id-differenza bejn Right to Know, Need to Know u Want to Know, u fejn għandek taqta' l-linja.

Għandi n-nawsja għax ġejja elezzjoni u qed nitħajjar nitla' xahar Taormina, biex nevita l-kampanja elettorali. Jew inkella nista' dejjem nordna sensiela DVD's ta' Alan Partridge u nidħak daħka.

Għandi n-nawsja għax qed niftakar fl-Underground ta' Londra u ġejja nostalġija ta' kollox, fosthom il-ħoss tal-ferrovija u il-Mind the Gap (il-mara li tat leħenha għal dik il-Mind the Gap tkeċċiet minn xogħolha għax fuq is-sit tagħha stess tellgħet xi parodiji ta' dawn il-messaġġi).

Għandi n-nawsja għax is-sena l-ġdida ftit li xejn ġabet melħ f'moħħ in-nies. Ratzinger maqdar lil Galilei fis-sena 2008. Bush għadu jgħid li l-Iraq hija rebħa Amerikana fl-2008. Għad hawn min hu razzist fis-sena 2008. Għad hawn min m'għandux id-dritt bażiku li jgħix ħajja ħienja. Fis-sena 2008.

Għandi n-nawsja.

Għandkom xi ħaġa għalija?

(She's Lost) Control (Again)

Kienet bilqiegħda ħdejn ommha. Widnejha miftuħin beraħ, ħalqha magħluq, xufftejha mgħaffġin flimkien fi tbissima stramba, kważi sfurzata. Idejha m'għandhomx kwiet. Qed jiżfnu żifna mgħaġġla u skomposta, bogħod minn għajnejn Ian. Ommha ma kinitx qed tagħti każ. Ilha hekk snin twal u issa ma tista tagħmillha xejn biex tfiq.

Ian ma kienx xi wieħed li jħobb jiftaħ ħalqu wisq. Kien kantant. Iżda kien kwiet, riservat, kważi sottomess biex ma ngħidx mistħi. Il-palk kien jagħmlu tiegħu iżda għal siegħa u nofs biss. Wara kien jinżel qisu xejn m'hu xejn. Kien ipejjep u jixrob xi ftit avolja t-tabib kien qallu li ma jridux kompli.

Ian ma kienx wisq f'saħħtu lanqas. Iżda kien poeta. Poeta riservat u kemmxejn aċidu minn Manchester. Iżżewweġ lil Debbie meta kellu tmintax, forsi ftit aktar. Dejjem qal li kien għamel żball bih dak iż-żwieġ.

Qal żewġ kelmiet ta' malajr fit-telefon li kellu fuq l-iskrivanija ċkejkna tiegħu. Qata'.

Għolla wiċċu lejn it-tfajla u lejn ommha. B'leħnu fond, aċċent qawwi tat-tramuntana, qalilha, "Għada mur iltaqa' magħhom hawnhekk," u ħarbxilha l-indirizz fuq karta.

Taha l-indirizz f'idejha. Wiċċha xegħel. Ian fehemha. "Kuntenta?" staqsieha, biex ikompli ftit magħha. L-imgħallem kien diġa qallu li kien daqsxejn żorr mal-klienti.

Iżda dik it-tfajla ta' quddiemu baqgħet ma tkellmitx, idejha bdew itertru b'aktar għaġġla, u f'ħakka t'għajn bdew itertru spallitha, għonqha, rasha. Ħalqha u dawk ix-xufftejn magħfusin flimkien bdew jitilfu l-forma.

Qabel ma ommha setgħet tagħmel xi ħaġa, it-tfajla waqgħet fuq ġenbha tal-lemin bis-siġġu b'kollox. Baqgħet itterter ma' l-art, wiċċha 'l fuq, ġisimha jagħti fuqu nnifsu qisha ħutha fuq il-blat. Ommha werżqet waħda ħafifa, maħsuda mhux daqshekk milli ġara, iżda mill-ħin li taha l-attakk.

Ian qabeż minn fuq is-siġġu, ħares lejn wiċċha mgħawweġ. L-istampa tagħha weħlet f'moħħu. Żewġ sekondi wara, sakemm l-istampa żviluppat ruħha, Ian ġera lejn il-kamra tal-banju u mar iġib tazz'ilma.

U hemmhekk, Corbijn qata' x-xena.

* * *

Fuq l-ajruplan lejn Londra, f'Settembru li għadda, kont qed naqra dwar il-film Control, biċċa xogħol tal-fotografu Anton Corbijn dwar il-ħajja ta' Ian Curtis, il-kantant tal-Joy Division, li miet meta kellu 23 sena. Sar leġġenda fl-Ingilterra ftit wara mewtu. Fil-film 24 Hour Party People, li kien jitkellem dwar tliet figuri ċentrali fil-mużika u fil-kultura ta' Manchester f'dawk iż-żminijiet, il-karattru prinċipali, Tony Wilson (magħruf bħala Mr Manchester) iħares lejn Curtis, fit-tebut tiegħu, u jgħid, Dan huwa l-ekwivalenti ta' Che Guevara fil-mużika.

Iżda Control huwa film maqtugħ xort' oħra minn 24 Hour Party People. Tony Wilson huwa karattru aktar serju minn dak li ħadem Steve Coogan. Ian Curtis (Sam Riley), il-karattru prinċipali, jitkellem ftit. Martin Hannett, li terz minn 24 Hour jitkellem dwaru, jitfaċċa biss xi ftit drabi, u biex joffendi lil xi ħadd waqt xi recording.

Iżda Control huwa kapulavur rari. Corbijn ħadem kollox black & white biex jagħti dak id-daqsxejn aktar atmosfera lill-Manchester ta' dak iż-żmien. Sam Riley daħal fir-rwol ta' Curtis wara li qatta ħinijiet twal jara l-videos ta' Curtis, u mal-familja tiegħu, mal-membri ta' Joy Division (li wara saru New Order), u fil-postijiet li għex fihom il-kantant.

Waqt Control ma tidħakx darba. Din mhux kummiedja, din hija storja.

Morru arawh. Anke għax, jekk għadkom taħsbu li Cobain, Kurt, ta' Seattle fl-Amerka huwa aktar prezzjuż, jista' ikun li terġgħu taħsbuha.

Ħasra li Tony Wilson miet ġimgħa qabel ma ħareġ dan il-film. Naħseb li Mr Manchester kien jieħu gost bih ukoll.

Minkejja li Spiċċat il-Ballottra...

Bil-Latin ser insejħilha l-annus horribilis tiegħi, u bit-Taljan, un annata di merda. Ħlief għal xi żewġ trofej tal-Milan, ma tantx kelli biex nitbissem matul din is-sena. Il-bqija, is-sena 2007 ser tinżel fil-kotba ta' l-istorja tiegħi (kontra qalbi għax lanqas biss ħaqqha post) għall-funerali u għad-diżappunti li ġabitli. Nittama li intom, għeżież qarrejja ta' dan il-blogg, ikollkom snin ferm aktar ferriħija mill-2007 tiegħi.

Fadal ftit siegħat biex tintemm is-sena. Għadni d-dar bil-piġama l-ġdida u b'nuqqas ta' aptit li niċċelebra l-wasla tas-sena l-ġdida. Anke t-temp ġie jitnejjek minn kullħadd u għamel ħiltu sabiex iħassar il-festi lil ħaddieħor. B'xorti tajba waslet telefonata f'waqtha mingħand sieħbi Jonny (x'nagħmel mingħajrek?) u l-problema ta' x'ser nagħmel fl-aħħar tas-sena malajr solviet ruħha.

Il-programm favorit tiegħi: ħamsa minn nies u daqsxejn inbid, rassa ta' xejn, problemi ħfief ta' parkeġġ f'Buġibba, u nistgħu saħansitra ngħidu erba' kelmiet bejnietna mingħajr ma ngħollu leħenna.

Tmiem is-sena 2007 wassal għall-għeluq ta' siparju ieħor. Saħħiet u grazzi, lira Maltija, inti li qattajt ħinijiet twal fil-bwiet tagħna u partatnik ma' xi ħobża mid-DeLippo jew xi Rothmans aħmar. U min jaf kemm-il birra, kemm-il xirja minn supermarket, u ikliet fejn xorta waħda ma jtikx li tħallas bil-card. Xi ftit ser inħossha l-mankanza tal-pitirross u tal-ballottra, il-granċ u d-denfil. U l-iktar li ser nibki hija l-munita tal-25 ċenteżmu.

* * *

Għall-wasla ta' l-Ewro, ġimgħa qabel is-slaten Maġi, għamlu tħejjijiet kbar.

Anke l-gvern qam fuq tiegħu. U l-NECC - immexxija minn ex-paracul ta' Gonzi, Alan Camilleri - bdiet il-kampanja medjatika. U allaħares tinqabad tfotti fil-prezzijiet.

Ħadu ħafna xogħol, kollha kemm huma. Nasal inneħħilhom il-kappell għaliex biex tbiddel il-munita ta' pajjiż sħiħ (speċjalment gżiritna, bit-tlajjiet u l-inżul tagħha) m'hix ħaġa ħafifa. Sfortunatament, avvenimenti bħal dawn jagħtu lok għall-aktar marda li ttini ġewwa, dik tal-lagħqiżmu sfrenat, u tal-ħela ta' flus.

Il-banek mexxew battalja sfrenata bejniethom permezz ta' riklamar u aktar riklamar. U jekk ma jirriklamawx, jagħmlu xi konferenza jew xi seminar dwar kif ser tolqotna l-munita l-ġdida. Sa ma wasal żmien il-Milied, iż-żewġ banek kienu diġa għaxxqu waħda kbira kull wieħed: Holdup fuq l-HSBC, ftit jiem biss wara li bdiet tiġri l-aħbar (korretta) li parti mhux ħażin mill-Euro converters li tqassmu f'kull dar mill-BOV kienu qed juru figuri mhux korretti.

Għaxxaqtuha, ħuti.

U għas-serata l-kbira organizzaw il-kbira nett: il-Prim Ministru ser jiġbed l-ewwel Ewro minn ATM li saret apposta għall-okkażjoni.

Murtali u bombi biex jimmarkaw nofs il-lejl, u d-dawl aħdar ikrah bil-logo ta' l-Ewro mdawwar fuq Sant'Anġlu. Kollox kien lest.

In-nofs Malta l-Laburista li kienet quddiem it-televiżjoni probabbli bdiet titlob li jseħħ xi ħaġa (kif jgħidu t-Taljani, gufava). U xi ftit Nazzjonalisti li għandhom għal Gonzi żammew magħhom.

Gonzi, bid-daħk imwaħħla fuq wiċċu, resaq minn fost il-folla sabiex tibda ċ-ċerimonja. Tawh platinum ta' l-okkażjoni. Probabbli tawh xi PIN ħafif, bħal 1111 jew 0000 biex ma jmurx jinsieh fil-fixla. Josef Bonello kien lest bil-mikrofonu f'idejh. Il-BOV ħasbulha wkoll, għalihom din kienet l-okkażjoni tad-deheb sabiex itellgħu żewġt iswaba' ħoxnin u jleqqu f'wiċċ il-kompetizzjoni. Ġabu magħhom saħansitra lil dik it-tfajla l-bjonda tar-riklami, dik li qatt ma daħket f'ħajjitha, u probabbli mlewha botolina sabiex tagħmel l-istess espressjoni tar-riklam u ma tmurx turi xi emozzjoni malli jitfaċċa quddiemha Gonzi.

Bil-card f'idejh, il-Prim Ministru li daħħal lil Malta fl-Ewrozona, resaq lejn din l-ATM b'xi flash jew tnejn ifaqqgħu f'għajnejh.

Iżda f'daqqa waħda, proċess bażiku li jseħħ kuljum, dak li niġbdu l-flus mill-magna, inbidel f'traġedja medjatika. Ewrotraġedja, anzi.

Flok il-karti bl-Ewro, tfaċċat il-kitba This ATM is temporary unable to dispense money. We Apologise for the Inconvenience. Gonzi żamm id-daħka fuq wiċċu, għalkemm kienet inqas wiesa minn dik li kellu qabel. Reġa pprova. Lasta għal darb'oħra. It-tbissima nbidlet f'imbarazz.

Nofs Malta li kienet qed tara din ix-xena nfaqgħet tidħak. In-nofs l-ieħor ma riditx temmen dak li qed tara. Anke Fredu Sant, mitfugħ f'kamartu l-Mater Dei, tbissem waħda. Aktar minn waħda. Sorsi interni (għax anke jien ikolli, tafux) qaluli li kellhom iżommuh in-nurses għax beda jqajjem pazjenti oħra bid-daħk u x-xehir tiegħu.

U min jaf liema ħsibijiet ġrew f'moħħ Gonzi dak il-ħin. Kieku hawn Austin diġa niżżilha bid-dagħa t-tinda. Kieku ġie jiġbed Fenech Adami kienet ittih iżżejjed. Ara jien ukoll. Madwaru kien hemm fixla totali. Ħarist lejn il-ġobnijiet li kellna quddiema fuq il-mejda u erġajt tfajt ħarsti lejn it-TV, fejn Alan Camilleri kien qed jibjad mad-daqqa t'għajn. L-istess xi żewġ mustaċċuni tal-Bank. Tonio Fenech donnu xagħru tilfet is-saħħa u lanqas kien jaf fejn jaqbad iħares. It-tfajla tar-riklam tal-BOV ma dehritx iżjed. Nissuspetta li tfewha u żarmawha dak il-ħin. Dik il-qaħbeċ ATM baqgħet ma ħadmitx.

* * *

Il-medja Maltija baqgħet ma qalet xejn dwar dak li ġara. Is-CNN stħaw ftit anqas.

Iddispjaċieni ftit għal Gonzi, tafux. Mhux tort tiegħu. Wara kollox min jaf kemm-il darba ġrat lili li ATM tal-BOV tirrifjuta li taħdem. U tista' mhux ittiha bis-sieq u toffendi lil R.E.D. u lil Depasquale. Jekk ma tridx taf, ma tridx taf. Lanqas jekk kunjomok Gonzi.

Lanqas ħaqq, jaħasra, il-ħela ta' riklami u billboards u x'naf jien li vvintat il-BOV. U lanqas ħaqq l-overtimes. Skond is-sorsi nfurmati tajjeb li dejjem ikolli jien ukoll, wiċċ il-membri tal-bord inbidel fil-burgundy li jużaw tal-BOV.

Ma ntikomx tort jekk tgħaddu minn ħdejn xi riklam enormi bit-tfajla li ma tafx tidħak stampata fuqu u tiżolqilkom xi tbissima.

Smile, this is 2008.