Sebgħa Dritt li Reġa Tgħawweġ...

Ħa nieħu pawsa qasira minn dak li kont qed nikteb dwar Beppe Grillo, sabiex pubblikament nirringrazzja lill-avukati tal-MEPA, li rnexxielhom jagħmlu dak li l-etika, l-ambjentalisti, u fuq kollox, l-onesta, qatt ma rnexxielhom jagħmlu.

Aqra hawn.

Meta Qabżitlu Beppe Grillo (2)

...ikompli

Beppe Grillo baqa' jidher u jerġa jinħeba għal ħafna mis-snin disgħin. Kien sar rarita' fuq it-televiżjoni, għax kien żgarra bil-kbir, kien rifes wisq swaba' importanti u meta tiċċajta mal-politika ma hemmx triq lura.

Fiż-żmien li kien moħbi xorta waħda baqa jagħmel spettakli f'bosta teatri u pjazez fl-Italja (xi wħud minnhom tista' tniżżilhom minn fuq eMule jekk tixtieq, għax Telepiu u xi televiżjonijiet satellitari oħra kienu jxandruhom). U minflok Grillo ċajtier beda ħiereġ Grillo iebes, mgħaddab għall-politiċi u għall-kapitalisti, lest li jifrex il-battalja tiegħu fuq ħafna fronti, fosthom l-ambjent, l-ekonomija, id-drittijiet umani, saħansitra l-edukazzjoni.

Grillo mhux ċuċ. Tidħak tarah jirraġuna quddiem l-udjenzi tiegħu, speċjalment meta taqbiżlu (taparsi) u jaqbad ma' xi vittma fit-tieni ringiela. Skond Antonio Ricci, ħabib antik ta' Grillo mis-snin tmenin li ħoloq Striscia La Notizia (programm ta' satira politika li jidher fuq Mediaset, inqas radikali minn dak li jippriedka Grillo), Grillo kien qed jieħu gost jidher oħxon, kważi qisu Ġaħan. Żamm dak ix-xagħar folt li dejjem kellu, li f'dawn l-aħħar snin qed isir griż dejjem aktar skur.

Grillo għamel ftit ħoss xi snin ilu propju permezz ta' Striscia la Notizia. L-ewwel episodju kien meta quddiem udjenza nies kixef sistema li kienet tuża l-Omnitel sabiex tagħmel profitt minn fuq il-klienti. Wara li din ix-xena dehret fuq it-televiżjoni ta' Berlusconi, inqala' terremot.

It-tieni każ kien meta Grillo kixef kif anke l-Parmalat kienet qed tfotti, u li l-Parmalat kienet se tfalli. Sentejn wara, minkejja libelli u x'naf jien, il-Parmalat falliet u magħha tilfu flushom ħafna investituri żgħar.

Din il-kategorija ta' nies hija wkoll għal qalb Grillo, speċjalment fejn tidħol it-Telecom Italia. Fl-2007, bħala rappreżentant tal-azzjonisti żgħar, attakka lil bord tad-diretturi minħabba l-operat tagħhom waqt il-Kunsill Ġenerali tal-kumpannija.

Fl-2005 ħareġ bil-kunċett li l-politiċi li nstabu ħatja ta' xi reat jew ieħor mill-qrati Taljani, kellhom jitneħħew mill-Parlament. Talab ukoll għar-riżenja tal-Ministru tal-Finanzi, Fazio, wara li dan inqabad fl-iskandlu tal-bank Antonveneta. Wasal sabiex, saħansitra, xtara paġna minn La Repubblica biex jispjega r-raġunijiet tiegħu.

ikompli bit-tielet parti: Grillo u l-Ambjent

Meta Qabżitlu Beppe Grillo (1)

Minn Ġenova, fl-Italja, ħarġu bosta nies li isimhom għandu post fil-kotba ta' l-istorja. Hemm Kristoforu Kolombu, li sab l-Amerka (jew aħjar, xi ftit gżejjer tefgħa ta' ġebla bogħod mill-Amerka ta' Bush u Ronald McDonald). Hemm Paolo Villaggio, magħruf bħala l-attur u l-kittieb li ħoloq is-serje ta' Fantozzi, sfruttat soċjalment mill-borgeżija kapitalista għal xogħlu. Insibu lil Fabrizio de Andre, l-ikbar poeta Taljan ta' wara l-gwerra, il-kittieb li bħal Fantozzi - jew Villaggio - kixef is-soċjeta u tħaddet dwar bosta temi, fil-forma ta' ħrejjef. Il-kitba tiegħu ġriet minn temi bħall-mara qaħba f'raħal żgħir (Bocca di Rosa) sat-terroriżmu ta' l-idealist żagħżugħ (il-Bombarolo).

Beppe Grillo twieled f'raħal fil-provinċja ta' Genova fl-1948. Studja liġi iżda qatt ma ħa l-lawrea; kiseb dik ta' l-accounting, iżda flok intefa' bi kwietu jaħdem f'uffiċċju, mar ifittex xogħol mar-RAI bħala komiku. Rah Pippo Baudo u għoġbu mill-ewwel.

Fis-snin tmenin bdiet tikber il-fama tiegħu. Beda jmiss is-smewwiet. Kaxkar premju għal serje ta' riklami tal-Yomo (ma jimpurtax li qed nagħmel riklam. Ngħidilkom ukoll li ma nikolx jogurt għax jibqa' tqil fuq l-istonku tiegħi għal nofs ta' nhar). Bil-mod il-mod, ċajta l'hinn u ċajta 'hawn, beda jinduna kemm hi tad-daħk is-satira politika.

Fl-1987 attakka bl-aħrax lil Bettino Craxi u l-Partito Socialista Italiano waqt wieħed mill-ispettakli tiegħu. U r-RAI warrbuh. Berlusconi qatt ma riedu Mediaset. Beda l-eżilju twil ta' Beppe Grillo, li kellu jistenna sal-1993 biex jerġa jitfaċċa fuq ir-RAI, fejn żamm 16-il miljun ruħ quddiem it-televiżjoni fl-ispettaklu tar-ritorn.

Dik kienet il-parti biografika. Għada nkompli b'aktar sustanza.

L-Aħbar it-Tajba

Amen. Aqra hawn.

Djarju Minn Londra, 2007

L-Erbgħa
Għallinqas, it-titjira kienet trankwilla. Lanqas niftakar min kien hemm ħdejja, naf li ftaħt il-Mojo magazine u l-iPod. L-ajruplan ma nifilħux, bdejt inħoss ħafna bard u qomt inbul tliet darbiet, jekk mhux erbgħa.

L-ewwel ħaġa li ridt nagħmel malli nżilna Heathrow kienet li nbus l-art; ma stajtx, għax hemmhekk tidħol mill-ewwel fit-terminal. Biex nasal għand Jon kelli naqbad tube lejn Piccadilly u ninżel hemmhekk, u naqbad il-Bakerloo lejn Maida Vale.

U Maida Vale, biex niftiehmu, huwa raħal sabiħ immens. Ftit bogħod minn Edgware Road, f'Maida Vale jgħixu nies sinjuri, kif tista' tara mit-traffiku ta' Audi/BMW/Opel Tigra eċċetera. Imxejt lejn fejn joqgħod Jon (b'xi ftit diffikulta, għax sieħbi ma tantx jaf jagħti direzzjonijiet, u spiċċajt Warrington Crescent li m'għandu x'jaqsam xejn ma' fejn kien joqgħod huwa).

Iltqajt ma' Jon f'Formosa Street, madwar tmien minuti minn fejn kien joqgħod. Biex naqta' qasir, kilna xi ħaġa ħafifa u ħriġna lejn Little Venice, minn fejn jgħaddi l-kanal, u mxejna lejn Paddington. Wasalna hemmhekk mingħajr wisq ippjanar.

Filgħaxija ltqajna ma' tlieta min-nies ħbieb tagħna: Bernard, Robert, u Pawlu, li jgħixu lejn il-Lvant ta' Londra (f'xi raħal fejn bil-lejl tibża timxi). Morna Brick Lane, f'Shoreditch, f'bar jismu Brick Lane li fakkarni ħafna f'Ġiġi's. Bieb ma' bieb kien hemm Rough Trade, ħanut li hu parti minn katina li kienet ukoll it-tikketta tas-Smiths fis-snin tmenin.

Epilogu tas-serata: Robert ordna ħobża għall-prezz ta' £6. Issa, din il-ħobża kulma kien fiha kienu biċċtejn ħobż tal-Malti, erbgħin folja rocket, u erba' faqqigħat żgħar. Kwarta wara, jien u Jonny ħadna burger enormi għall-prezz ta' £3.50, ftit passi 'l bogħod minn fejn konna.

Il-Ħamis
Is-sema kemmxejn griża. Fil-pjazza li hemm 'l isfel minn Piccadilly, minn fejn timxi lejn Soho jew Chinatown, hemm Afrikan qed idoqq gitarra simili għal sitar, bil-ħoss li kellu Ali Farka Toure. Waqfu xi nies quddiemu. Jien u Jonny li qegħdin bilqiegħda ftit bogħod minnu nieklu ġelat ta' Ben & Jerry's. U, sakemm in-nies li għaddejjin waqfu jisimgħu dik id-daqqa ħelwa u mhux tas-soltu fis-skiet taċ-ċentru ta' Londra, tfaċċa pupazz ta' ors liebes l-uniformi ta' gwardja rjali, u ntefa ħdejn id-daqqaq Afrikan. Fost il-ferħ tat-tfal, beda taparsi jdoqq fuq il-bongos, imbagħad ra żewġt itfal u żgħar u mar jifrah bihom. L-Afrikan, bid-daħka fuq wiċċu, baqa jdoqq. Sakemm ġie sieħbu b'borża minn Burger King. Wasal ħin l-ikel.

Morna lejn Covent Garden u qgħadna nduru u ngħaqdu fid-daqsxejn ta' suq li hemm. Ma xtrajt xejn. Imxejna lejn Soho u Chinatown. Qbadna tube lejn is-South Bank u tlajna fuq l-Eye of London. Temp perfett biex iġġib Londra kollha taħtek: minn Camden sa Maida Vale, u saħansitra t-Torri ta' Londra jidher ċkejken. Prosit ħafna, British Airways.

Filgħaxija morna lura lejn iċ-ċentru niltaqgħu ma' seħibna Adrian (aktar Maltin jiġru Londra fuq xogħol) u ħadna birra Soho. Mal-ħdax ta' bil-lejl keċċewna.

Il-Ġimgħa
Dalgħodu qomt tard. Ħafna. U ħlomt stramb, ukoll. Iżda dik tiġri ta' spiss.

Morna nieklu f'post qrib Maida Vale, mixja twila lejn ristorant jismu l-Electric. Imbagħad jgħidulek li l-Ingilterra tiekol ħażin? U qattajna waranofsinhar ta' mixi, matul il-kanali li hemm fiż-żona, u f'toroq twal u wiesa. Wasalna Portobello Road u qgħadna nduru fost il-wirja ta' imbarazz stramb li kien hemm. Kważi ġġennint x'ħin sibt wieħed ibiegħ LP's fuq vinyl. Imma jiswew £10-il wieħed, u m'għandix fuqhiex indoqqhom.

F'nofs it-triq rajna mutur armat minn partijiet differenti, donnu sett tal-Mekkano bir-roti. Waqafna nħarsu għax għelbitna l-kurżita. Minn ġo ħanut li jbiegħ ġgieket tal-gwerra u ħwejjeġ simili, tfaċċa wiċċ familjari. "You like it?"

U qbadna diskursata fuq il-mutur ma' dan ir-raġel. F'qalbi qed nistaqsi ruħi fej nafu, u x'ħin qal "I fucking hate traffic wardens" għaraftu: Huggy Leaver, li kellu parti żgħira f'Lock, Stock and Two Smoking Barrels (Guy Ritchie, 1998). Biex niftiehmu, wara li ħadna b'idejn xulxin, qalilna seba' jew tmien darbiet li ħadem f'dan il-film. Dħakna ftit x'ħin qalilna li kulma għamel fuq dak il-mutur kien (minbarra ċ-ċitazzjonijiet) li qatel raġel u l-ieħor ma ġralu xejn, tilef żewġt iswaba biss. Kellu saħansitra kaxxa żgħira fuq it-tank minn fejn ikun jista' ipejjep xi sigarett minn dawk waqt li qed isuq.

Waranofsinhar waqafna f'pub fuq il-kanal u ħadna tnejn birra, bħas-soltu. U filgħaxija erġajna ltqajna mat-tlieta l-oħra, morna fir-raħal li ma jmut qatt: Camden Town. Domna barra mhux ħażin, anke għax aħna l-Maltin imdorrijin għal Paceville, sibna l-iktar post simili għal dik il-ġungla li fit-tlieta ta' filgħodu tkun għada mqajma. Wara bosta daħk u vodka, spiċċajna nieklu veru ħażin minn wieħed mit-takeaways tal-post. U kważi ddispjaċiena.

Is-Sibt
Big day, today. Biex ma naħlix enerġija qomt tard, bqajt ġewwa nara r-rugby u l-cricket, u għadni sa llum ma fhimt xejn. Mas-sitta ta' filgħaxija konna qed nistennew it-tube lejn Richmond, fin-nofsinhar ta' Londra, li damet kwarta ma nafx għal liema raġuni.

Dik il-kwarta tellfitna s-show tal-Maximo Park. Wasalna fl-aħħar tliet diski, eżatt wara li Paul Smith kien għadu kif lesta s-single Books from Boxes. Qabel dik konna qbadna karozza tal-linja b'xejn miċ-ċentru ta' Twickenham u mxejna lejn il-grawnd.

Fit-tmienja u nofs neqsin ħamsa ntefa d-dawl u ħoss ta' gong enormi ħabbar il-bidu ta' l-ispettaklu tal-Police. Sting, liebes flokk abjad mingħajr kmiem, ma jidhirx li għandu ħamsin sena. Lanqas Stewart Copeland, li kien jidher donnu qed jieħu buzz kbir idoqq. Andy Summers, insomma, kien naqa aktar kwiet mit-tnejn l-oħra. Għamlu is-serje ta' suċċessi kbar li għalihom kienu magħrufin il-Police, grupp li niftakar nisma d-diski tagħhom meta kont għadni żgħir: Walking on the Moon, De Do Do Do, De Da Da Da, Every Little Thing She Does is Magic, Roxanne u l-favorita tiegħi King of Pain. Daqqew saħansitra Invisible Sun. Stewart Copeland kien spettaklu waħdu. Ma waqafx minuta. U ried jibqa' l-aħħar wieħed fuq il-palk, wara li daqqew l-encores (fosthom Every Breath you Take) u qal lil 55,000 li kienu qed isegwu This is our town - London. I'm American, but this is where we come from right here!

Mort id-dar soddisfatt, ħafna. Fuq it-tube dħakna daħka bin-nies li kien hemm, fosthom Ċiniż li beda iwessa għajnejh ma' kull tfajla li titla, u erba' żgħażagħ barranin minn ma nafx fejn, speċjalment għax wieħed minnhom kien liebes donnu Inspector Gadget. Ma flaħniex ma nidħkux bihom f'wiċċhom.

Il-Ħadd
Spittlefields Market, ħdejn Shoreditch. Tibda fiż-żona kwieta, timxi lejn affarijiet aktar indie, u bil-mod tasal f'żona fejn hemm kull tip ta' immigrant li jbiegħ kull tip ta' ħaġa - misruqa. Saħansitra qliezet ta' taħt immarkati "Calvin" mingħajr il-"Klein" sibna. Kollox jiswa £1.

Kilna pizza mhux ħazin Strada, f'Holborn, fejn kien jaħdem Jon sa ftit ilu. U minn hemmhekk morna nistrieħu. Illejla għal Trafalgar Square.

Hemm Calvin Harris u Chemical Brothers. Trafalgar Square għadha qed timtela. Tawna n-nuċċalijiet biex tara kollox 3D, u biex xtrajna birra rajna l-passjoni. Qgħadna naraw lil Calvin Harris, u napprezzaw l-iSkoċċiż tiegħu, apparti mill-fatt li huwa bniedem kemmxejn mistħi. In-nuċċalijiet kienu ftit għalxejn, pero.

X'ħin bdew Chemical Brothers beda l-imbuttar. L-Ingliżi jieħdu gost ukoll, tafux, u fis-siegħa u ftit li daqqew kien hemm spettaklu bl-animations li impressjonani. Ħadt gost aktar milli ħsibt, u biex ngħid kollox, qbadt naqbeż waqt Block Rockin Beats. Ta' warajja ma kienx hemm minuta li ma qabżux. Dulcis in Fundo, x'ħin spiċċat is-serata kien hemm Taljan li beda argument twil ma' żewġ uffiċjali tas-sigurta għax beda jisfidahom u jinżel jaqbeż fil-funtana ta' Trafalgar.

Mixja, karozza tal-linja lejn id-dar, u biċċa ċikkulata qabel ir-raqda.

It-Tnejn
Qabżitli u qomt tard, qabżitli u mort Camden, u spiċċajt nixtri. Filgħaxija ordnajna Chinese u qgħadna naraw l-MTV, u nitnejku b'Britney Spears. Ġurnata ordinarja f'Londra. Qed nidra saħansitra l-aċċent.

It-Tlieta
Morna sa Hyde Park, ħarġet ġurnata xemx li anqas Malta ma ssib bħalhom. Kilna biċċa salmun eċċezzjonali u krejna paddleboat, qgħadna naqdfu f'nofs Hyde Park qalb il-papri u l-għasafar. Inżajt b'żaqqi barra għax hemmhekk ma jafek ħadd biex jgħajrek bluffer, u għax it-temp kien sabiħ tassew.

Illum l-aħħar jum f'Londra. Għalaqna bit-tajjeb: BBQ fil-ġnien ta' Richie, wara li ovvjament fgajna ħames blokkijiet appartamenti bid-duħħan li konna qed nikkawżaw. Kilna ikla kbira, Richie għamel potato salad li beda nieżel għasel. U kien għad fadal ħafna ikel x'jinżel.

L-Erbgħa
Qomt fis-sebgħa u nofs. Ħadt tazza kafe, pejjipt sigarett, qbadt ħwejġi, għedt ċaw lil Jonny, u qbadt tube mimli sa ruħ ommu lejn Piccadilly. Fejn inżilt, u qbadt ieħor kemmxejn anqas mimli li żvojta sakemm wasalt Heathrow Terminal 4.

Il-paċi li kelli f'qalbi dik il-ġimgħa għebet malli smajt l-ewwel leħen Malti sakemm qed nistennew biex nitilgħu fl-ajruplan.

Ġejja titjira oħra, u ta' ħdejja mid-dehra kellha aptit titħaddet. B'xorti tajba fis-siġġu l-ieħor ma kien hemm bilqiegħda ħadd, u għalhekk, bl-iskuża ta' l-uġigħ fil-ligamenti, qomt u poġġejt fih. Ftaħt l-iPod kollu, u qgħadt naqra.

It-temperatura f'Malta hija ta' 29 grad. Il-qaħbeċ.

Peter Molinari

Settembru, biċ-ċajt iċ-ċajt, wasal ukoll. Ma ndunajtx mill-ewwel, l-aktar għax l-arloġġ tiegħi ma jgħidlikx x'inhi d-data u allura jekk inqum mitluf, ikolli bżonn noqgħod infittex il-kalendarju.

Settembru ma nafx b'liema fatta bdejtu. Għadni qed nistenna bil-ħerqa li nitlaq għal dik il-vaganza li ilni nitlob għaliha żmien, u li fl-aħħar waslet, u xorta nibqa' nisħet lili nnifsi li ma mortx nara lil Tori Amos f'April li għadda.

Ma hawn xejn x'tagħmel, għajr li tistenna x-xitwa. Spiċċa l-istaġun tal-baħar (għax issa jqum ir-riħ u ġej is-sħab) u beda dak tal-futbol. Allura hemm xi ħaġa x'tara u fuqhiex tikkonċentra, bħall-blalen moħlijin minn Adebayor u minn nuqqas ta' logħob ta' Tevez, biex insemmu tnejn.

L-ewwel ħadd filgħaxija ta' Settembru mort nara kunċert ta' Peter Molinari. Ma nafx fejn kont smajt bih qabel lil dan l-artist Ingliż, naf li ismu familjari, u dik weħidha kienet raġuni valida ħafna biex nattendi.

Peter Molinari ġie Malta bis-saħħa ta' EventsMalta - jew x'jisimhom - organiżżazzjoni mtella' minn Luigi Pellegrini (tal-Beangrowers) u Jean (ex-DJ ta' l-Alley). Għandhom għal qalbhom il-mużika alternattiva u dak kollu li ma tismax fuq ir-radju, u jiġbru magħhom nies li huma (in teoria) iktar kolti minni fil-mużika.

(Jekk tippermettuli, naħseb li Lm4.50 huwa prezz kemmxejn għali. Veru hemm l-ispejjeż, iżda ma nemminx li l-isponsors jisparixxu malli ssemmi l-kelma alternative.)

Qabel Molinari hemm dwett Ingliż, The Burning Leaves, u fil-bidu nett artista Maltija, Carrie.

Din Carrie tfakkarni ħafna - aqtgħu ftit - f'Tori Amos u Kate Bush. Għadha żgħira u leħenha jġorr miegħu l-emozzjoni u s-saħħa ta' mara matura. Fuq dan, għal darba, jien u David Vella (ta' Temple Studios) sibna ruħna nitkellmu l-istess ilsien. Fost id-diski tas-serata tagħha, spikkat il-verżjoni tagħha ta' Love Will Tear us Apart tal-Joy Division.

Ma domtx ma ftakart minn fejn smajt b'Peter Molinari. Waqt il-kunċert ta' Burning Leaves kien bilqiegħda ħdejja flimkien ma' sieħbi Kurt, li magħhom għandu parentela mill-bogħod. Molinari lħinkollu jitnejjek. Fis-silenzju tal-mużika ta' Burning Leaves, ħin minnhom, b'leħen baxx biex ma jinstemax, talab lil kantanta biex tikxef parti minn ġisimha. Jien u Kurt bdejna nippruvaw ma ninstemgħux nidħku fis-sikta ġenerali ta' l-Universita.

Ħaġa oħra li biha beda jidħak seħibna Molinari kienet iż-żebbuġ mimli. F'nofs diskussjoni jew oħra jitfagħlek xi then we go for żebbuġ mimli jew xi ġbejniet bil-bżar. Jidher li qabel ma wasal hemm, staqsa lil Kurt f'liema Universita Maltija kien ser idoqq. Jista' ikun li tfixkel id-dar ta' Louis Galea ma' xi universita' oħra?

The Burning Leaves ma kinux ħżiena, iżda għal min jaf japprezzahom bla dubju li kienu xi ħaġa kbira. Il-mużika tagħhom ma fihiex sorpriżi u ma fihiex tidwir mal-lewża. Jagħmlu saħħa lil xulxin b'leħenhom, iġorru lil xulxin. L-apparenza tagħhom fakkritni fil-White Stripes, kemmxejn anqas ħomor bħala ħwejjeġ.

F'nofs il-quadrangle ta' l-Universita sadattant bdew iduru n-nies tax-xena, fosthom żewġ ġenji li jqattgħu ħinhom fil-forum ta' sit, imaqdru dak kollu li ma jogħġobhomx fil-kamp tal-mużika, bil-massima ta' My milkshake will always be better than yours.

Wieħed minnhom maqdar lil wayneflask.com u lil Wayne Flask (lili, biex niftiehmu) sakemm finalment nixxef ilsienu. Għadni sal-ġurnata tal-lum nistaqsi ruħi x'għamiltlu lil dan ir-raġel, jista' ikun li qatt ma nsib risposta. Sadattant, il-grupp eċċezzjonali, fabuluż, enormi, li xiħadd (hu stess probabbli) qabbilhom mal-Cure ta' Malta, spiċċa jitkagħweġ fix-xejn, vittma tiegħu nnifsu.

Tlaqt lejn id-dar f'nofs is-show ta' Molinari. Biex inkun onest, għajjejt, u l-mużika bdiet traqqadni. Mhux għax sieħbi Peter kien ħażin, iżda ma kellix aptit ta' Bob Dylan fil-ħdax ta' bil-lejl. Ma ttinix tort, mhux sa barra.

(Kjarifika mistħoqqa, u hawnhekk nirringrazzja lil Jean talli ġibidli l-attenzjoni: il-biljetti setgħu jinxtraw għal Lm3.50 minn xi ħwienet madwar Malta.)