God's Gonna Cut You Down

"You can run on for a long time
Run on for a long time
Run on for a long time
Sooner or later God'll cut you down
Sooner or later God'll cut you down"

Din hija waħda mill-aħħar iljieli ta' Diċembru, 2006. Sena twila bħall-oħrajn, fuq il-kalendarju. Sena qasira aktar mill-oħrajn, għallinqas, fil-kurituri ta' moħħi.

Ma domtx wisq ma rqadt, wara parlata twila fejn anke l-inbid li kelli ġo fija qal xi żewġ kelmiet. Marret għajni bija, u fis-sagħtejn ta' filgħodu qajjimni l-VH1. Leħen ta' raġel, maħnuq, tisimgħu darba u tinduna li għadda minn fuqu l-għamad taż-żmien. Hemm rabja bierda fih u fil-kitarra fqira, kważi bla grazzja, li għaddejja fl-isfond.

Qed juru video ta' Johnny Cash - li miet żmien ilu, meta jien kont għadni DJ il-Coconut. Fil-video ma jidhirx Cash innifsu, imma jgħaddu l-uċuħ u l-ħsibijiet ta' Iggy Pop, Bono, Patti Smith, Kris Kristofferson, Kate Moss, Justin Timberlake, Anthony Kiedis, Flea, Jay Z, Keith Richards, Johnny Depp, id-Dixie Chicks, Terrence Howard, Dennis Hopper u lejn l-aħħar, il-producer Rick Rubin.

Fil-ħemda ta' dak il-lejl ta' Diċembru, iż-żewġ minuti ta' dan il-video suppost ikunu biżżejjed biex wieħed jidħol ftit fih innifsu. Fl-aħħar, Rubin joħroġ minn karozza u jitfa' mazz fjuri minn fuq irdum, għal isfel, fil-baħar.

Dawwart wiċċi 'l isfel, u bħalma nagħmel dejjem, erġajt irqadt.

* * *

Ħriġt fl-erbgħa ta' filgħodu, fid-deżert tal-pjazza tas-Siġġiewi. Id-dawl baxx. Il-ħġieġ ta' dak li xi darba kien flixkun tal-birra għadu ma' l-art, fid-daħla tas-sqaq. L-uniku ħoss biex iżomm kumpanija lil San Nikola kien ġej minn radju żgħir, li dejjem nisimgħu għaddej igedwet waħdu fil-ħemda, u qatt ma nista' naqbad minn fejn ikun ġej.

Wasalt id-dar u xgħelt il-kaxxa. Fuq ir-Raidue, flok dak li jgħaddi l-ħin jispjega l-matematika, kien hemm l-aħbarijiet. U dawwartlu fuq ir-Raiuno u fuq ir-Raitre, kien hemm l-istess. Għollejt kemm kemm il-volum, biex ma nqajjimx dar sħiħa. U qlibtlu fuq it-teletext, malajr. Donni kont naf x'ġara.

Lil Saddam, rabtuh minn għonqu u għallquh.

* * *

"Go tell that long tongue liar
Go and tell that midnight rider
Tell the rambler, the gambler, the back biter
Tell 'em that God's gonna cut 'em down
Tell 'em that God's gonna cut 'em down"

Saddam Hussein al-Tikriti, fl-aħħar waslet tiegħek ukoll. Ħallewk għaxar minuti mdendel minn għonqok, taħtek kien hemm ix-xejn. Inti bqajt sa l-aħħar tgħid li inti l-President ta' l-Iraq u li kulma kien qed jiġrilek kien assurd, illegali. Imma minn meta qabduk, għonqok kien diġa marbut u kont taf li mill-patibolu ma kellikx ħelsien.

L-uniku ħasra hi li tlaqt daqshekk malajr. Messek batejt ftit inti ukoll, bħalma batew dawk in-nies kollha li għexu - u mietu - fi zmienek. Tafx, Saddam, issa ġejt fi kliem id-diska ta' Cash. Ħadd wara Ħadd tasal ta' kulħadd.

Minjaf illum kemm-il familja fin-nazzjon li inti mexxejt - jew kaxkart minn għonqu - ser torqod daqsxejn aktar kuntenta. Fl-aħħar, saret ġustizzja għat-telfiet tagħhom.

Imma tafx, forsi ma saritx għal kollox.

Għada filgħodu, bis-saħħa tiegħek u ta' iben sieħbek li kien itik l-armi, dawn in-nies iridu joqogħdu attenti fejn jimxu. Ma jafux hux ser imorru lura lejn darhom biex jiċċelebraw il-Hajj mal-familja.

Int u min dendlek kollha l-istess. Issa, pero, hawn wieħed inqas.

Tistennix fjuri, did-darba.

Camden Town (8)

Battikata minn dawk il-kbar, iġġib xi ħaġa minn Londra lill-familja u lill-maħbuba. Bdejt inħoss għajnejn kullħadd jifluni, sakemm kont fuq dak it-tube minn Piccadilly għal Leicester, minn fejn imbagħad, wara taraġ mill-kbar, naqbad it-triq għal Mornington. Messni ħadt bus, għedt f'qalbi, imma hawnhekk għadni ma nistax nifhem kif taħdem ir-rotta.

Waqaft Mornington u bdejt inħossni mfarrak. Mort lura l-flat, tfajt l-imbarazz li xtrajt flimkien ma' l-oħrajn, u ntfajt fuq is-sufan. Erġajt qomt, ftaħt il-bagalja, u ħarist lejh għal darb'oħra. In-numru 11 ta' van Persie, fuq l-aħmar tal-flokk ta' l-Arsenal. Dalgħodu, bħal tifel ta' 12-il sena, erġajt tlajt niġri Finsbury u mxejt lejn l-Emirates, biex nistampa l-flokk bin-numru tal-favorit tiegħi. Hekk jew hekk, rikordju mill-aqwa.

Kif kont hemm, xtrajt mug tal-Gunners għal fuq il-mejda ta' l-uffiċċju. Tant għandi bokka bih li lil Ċelestina qas inħalliha tieħdu biex taħslu.

* * *

Ma' Jonny kont miftiehem biex niltaqa' ħdejn Niketown. Kont se naqbad bus bi żball (imn'alla tliftha) imma wasalt bla xkiel. Dorna l-aħħar ftit, xtrajt xi ħaġa għal ommi u mbagħad morna Next, għax Jonny għadu ma sabx dan l-imbierek size 40 għal Wenza.

Il-manager tal-ħanut daħkitilna x'ħin ratna, jien b'handbag f'idi u Jonny b'żarbun tat-takkuna. Konna nidhru li m'aħniex Ingliżi, probabbli, ħasbet, xi żewġ Griegi b'gosti naqa strambi.

* * *

Neħħejt il-kappell li xtrajt il-ħadd filgħodu, u qgħedtu fuq irkoppti. Ordnajna l-ikel. Illejla l-aħħar lejl f'Camden.

Id-dieqa bdiet tidħol fija bil-mod. Ma flaħtx nitbissem. Iktar u iktar meta, fi Strada ta' Camden, ġie platt ravjul li kemm kemm kien fih tużżana.

"Niftħu l-Martini llejla?" qalli Jon. Naħseb induna li ma kontx f'tiegħi.
"Mela le," għedtlu. Tbissimt kemm kemm, u ħadt qatra oħra Peroni.

Kollox irid jintemm.

* * *

Għadda kollox minn quddiemi qisek qed tara l-film ta' ġimgħa sħiħa. Kelli żewġ bagalji u basket x'inġorr, kelli niftakar inħalli ċ-ċwievet tal-flat lil Jonny, flimkien ma' l-Oyster Card, u kien hemm taxi qed jistennieni barra, għal Paddington.

Nieżel it-taraġ, ħbatt kemm kemm fir-rota li Jon iżomm marbuta fl-indana tat-tieni sular, u ħriġt. Tat-taxi ma tantx kien orrajt u dak il-ħin staqsejt lili nnifsi għalfejn ngħidu dejjem li "aħna l-Maltin..."

Fuq it-taxi għadda kollox minn quddiemi. Il-'veduta' mit-tieqa tal-kċina ta' Jonny. Tas-sular ta' fuq li jibdew idoqqu t-trumbetta, fit-tmienja ta' bil-lejl. It-tubes, l-Osyter Card, l-ismijiet ta' l-istazzjonijiet, bożji u formali, miktubin iswed fuq abjad taħt il-linji kkuluriti tar-rotot.

U iktar: l-aħħar ritratt ma' Jon u Laura. L-ikla ta' nofsinhar f'Holborn, fejn jaħdem Jonny. L-aħħar tgħannieqa ma' sieħbi tal-Gudja. Lillywhites. H&M. Camden Market u l-bejjiegħa ta' ġakketta tal-ġilda. Id-daħka ta' tfajla samranija li waqqfitni filgħodu b'offerta ta' l-O2.

It-taraġ ta' l-Emirates u l-ferħa li ħassejt x'ħin rajt l-istadium. L-armata ta' supporters mexjin lura lejn darhom wara l-logħba. Innijiet. Riħa ta' chips u ħaxix maqtugħ pulit fil-ġonna ta' Londra. Is-skiet f'Hyde Park.

* * *

Irringrazzjajt lil tat-taxi. Ġrejt ġirja biex nilħaq il-ferrovija lejn Heathrow. Xi dwejjaq, xi dwejjaq.

* * *

Fuq l-ajruplan kont bilqiegħda ħdejn Sako u Martin. Il-film fuq l-Airmalta kien tal-qamel, u anke l-ikel: ġew bil-ħut. Jiddispjaċini, ħut ma nikolx. Għamillu platt fużilli għax is-sinjorina ma jħobbux il-ħut, ħaseb l-isteward.

Fid-dieqa ġenerali bdejt inħares l-isfel u rajt Kalafrana u Marsaxlokk. X'għafsa ta' qalb.

Sako, ħdejja, kien ismar mix-xemx ta' Valencia. Issa qed nistennew il-bagalji. U issa qed noħorġu 'l barra, mexjin lejn il-familji li qed jistennewna.

Erġajna lura d-dar. U qed inħossni nsejt xi ħaġa warajja. Naħseb ħallejt qalbi f'Camden.

Xi darba nerġa nitla, bl-iskuża li se mmur infittxha.

Camden Town (7)

Il-kantilena "You are not singing/You are not singing/Anymore" kienet għadha qed tidwi f'widnejja x'ħin qomt il-ħadd filgħodu. Il-lejla ta' qabel kont vittma ta' barman Ingliż, fil-Crescent ta' Camden, pass bogħod mid-dar ta' Jonny. "Milanista... Looooser!!"

Il-Milan kienu qed jitilfu 3-0 ma' l-Inter dak il-ħin. Spiċċat 3-4 u fl-aħħar ballun għal naqa ma ġiex id-draw tal-Milan. Xtaqt id-draw mhux għall-Milan, iżda biex inkun nista' nuri subgħajja t-twil - tan-nofs, biex niftiehmu - lil dak il-qaħba barman. Li, kif qalli Jonny, kien jiġi jitnellaħ mill-football u xogħlu kien biss li jgħaddi ftit taż-żmien. L-Ingilterra dawn l-affarijiet iseħħu ta' kuljum. Hawn Malta, ma tagħmilhiex daqshekk ta' spiss.

Laura telqet għax-xogħol ftit aktar tard mis-soltu; Jonny kien burdata tajba u qam isajjar il-bacon, iz-zalzett u l-bajd. Imbagħad wara shower tajba ħriġna nduru Camden Market.

Kuluri. Dil-belt kollha kuluri. U rwejjaħ ukoll. Irwejjaħ ta' ikel Marokkin imħallta ma' dik tal-ġilda tal-ġkieket; twapet u inċens ta' kull tip flimkien ma' kull tip ta' antikwarjat li tista' timmaġina. Imbarazz bħal comics ta' żmien Borg Olivier (illum sofor, qodma, u mhux daqshekk prezzjużi) u settijiet tat-telefon bir-rota, li hawn Malta bqajna nużaw sas-snin disgħin. Toħroġ mill-bini tal-monti u ssib monti ieħor fit-triq, nies kullimkien, iħarsu lejn ħanut li jispeċjalizza f'affarijiet li jilbsu l-psewdo suldati neo-nażisti sakemm ħarsithom taqa' fuq dak li qed ilesti il-paella ftit passi bogħod. Ħanut enormi tal-goth metal għal dawk li jgħaġġlu, u eżatt quddiemu wieħed li jbiegħ it-targi bl-ismijiet tat-toroq f'Londra.

Imxejna lejn Chalk Farm, mhux wisq bogħod minn fejn konna. Ħadna burger homemade mill-Fogg, burger enormi li baqa fl-istonku tagħna għal siegħat twal.

* * *

"No, no, no. It don't work like this."
Ksaħt. Qabżet qatra għaraq kiesaħ minn ġo fija. Intfajt lura, fir-rokna, u tlabt għall-ajjut, fis-silenzju.

Wara ftit minn wara l-bieb tfaċċat Laura. Għajtet lil Jonny. Jonny ġie u pprova jirraġuna. Imma dak ma riedx jisma. Jonny ħabat se jinfixel. "But... because... I just wouldn't do it."

Kien enormi, ibeżżgħek bil-ħarsa tiegħu. Jekk ikollok l-inkwiet tibda titlob li l-istretcher li biha jeħduk lejn l-ambulanza tkun komda. Il-bouncer tal-Comedy Store intefa' quddiemna. Dort fuq Jonny u mingħajr ma tbissimt wisq, għedtlu "Min tefa d-dawl?" Jonny daħak.

"Biżżejjed... tidħakx bħalissa!" għedtlu kemmxejn ippanikkjat.

Il-bouncer mar jiċċekkja mal-box office jekk kienx għadu kif qatta tliet biljetti, flok tnejn kif kien qed jgħid hu.

Ifhimni, għażiż qarrej: meta tara lil xi ħadd daqshekk kbir jipprova jieħu raġun, ittihulu. Speċjalment meta jsikktek ("Shut up, listen, I'm the one who talks") u jgħidlek li hu mhux ċuċ ("I know what I'm saying, you shut up").

Tal-box office qallu li kellna raġun. Dar lejna, qalilna "Ok, go in." Jien ħadt nifs u għamilt pass. Żomm. Ħa nara xil-Madonna inqalgħalu.

"You, leave those bags in the cloakroom when you go in, to the right." Għamilt kif kien talabni - jew aħjar, ordnali. Jonny ma kienx semgħu u dar lejja, u bir-raġun saqsieni għalfejn.

"Ifhem Jonson... jekk trid tmerih..." għedtlu jien.

Jonny reġa daħakha.

* * *

It-tnejn filgħodu qomt b'ħalqi juġagħni bid-daħk li dħakt. Imma issa, rrid immur Oxford Street ħa nweġġa ftit il-Visa tiegħi.

...ikompli

Camden Town (6)

Jien għalija kienet biżżejjed il-vaganza, il-fatt li qiegħed hemm, il-fatt li rajt l-Emirates isbaħ milli diġa jidher fuq il-kaxxa. Imma l-oħrajn li kien hemm madwari, liebes bħalhom għall-okkażjoni, ma ridux jafu b'telfa. L-atmosfera m'hix biżżejjed. Il-ferħa li tara l-Emirates għalihom ilha li għaddiet: rawh f'Lulju meta Bergkamp ġie jgħid 'ċaw' ta' l-aħħar, u meta miegħu kien hawn nies bħal Van Basten, Kanu, Vieira, Adams, Bould... kollha leġġendi f'din in-naħa ta' Londra.

Issa qed jaraw lil Van Persie, Hleb, Gilberto, Toure u Rosicky jitħabtu biex jirbħu ma' l-Everton. Gulija ibati ma' David.

U lanqas Henry ma kien qed jagħmel ħafna.

* * *

Neħħejt il-kamera minn idejja u poġġejtha fil-basket li kelli ħdejn saqajja. Issa ġbidt biżżejjed ritratti. Issa qed nikkonċentra fuq il-logħba. U chances kien hemm kemm trid. Imma baqa ma riedx jidħol.

Għaddiet aktar minn siegħa logħob. Ħin minnhom bdejt nogħrok għajnejja. Wenger neħħa lil Djourou (difensur ċentrali) u poġġa lil Walcott. Qatt ma rajt lil Wenger jilgħab bi 3 difensuri fuq wara; u lanqas illum ma kont ser narah. Sakemm qam ground sħiħ iċapċap u jgħajjat "Theo, Theo, Theo," iż-żgħir mar fuq wara, fuq il-lemin, fejn issoltu jilgħab Eboue li llum imweġġa. X'riedu jagħmel Wenger?

Ftit sekondi wara, Walcott ħa l-ballun mill-kaxxa ta' l-Arsenal u qasam sal-kaxxa ta' l-Everton, jiġri daqs għafrid u jaqbeż żewġ players fi triqtu. U kulħadd, b'Jonny b'kollox, qam iċapċap.

Minuta 67. Fabregas jirbaħ freekick minn barra l-kaxxa ta' l-Everton. Van Persie qiegħed il-ballun f'postu, Henry kien qiegħed bilwieqfa ħdejh u ħadd ma kien ċert min se jtih.

Tah Van Persie. U daħal.

U qalbi ħarġet.

* * *

Spiċċat 1-1. Ħriġna fost folla ta' supporters ta' l-Arsenal, siekta ħlief għal xi tnejn li ma setgħux jemmnu n-nuqqas ta' riżq li kellhom il-Gunners illum. Ippruvaw minn kollox imma baqa ma daħalx.

Imxejna mixja twila lejn Islington, raħal sabiħ immens fejn tista' tonfoq flusek tiekol u tarma d-dar tiegħek. Ma kienx hemm tama li taqbad it-tube minn Finsbury Park jew minn Arsenal lura għal Camden, minħabba l-armata ta' supporters li kien hemm fit-toroq.

Finalment qbadna karozza minn Angel (wara li morna nixtru żarbun minn Next, għal Laura s'intendi) u wasalna Camden. Il-ġuħ ħakimni, imma filgħaxija kien hemm id-derby ta' Milan. Ħa naraw x'hemm fuq il-menu tal-McDonalds.