Camden Town (5)

Inżilna mit-tube tal-linja s-sewda, wara mixja qsajra lejn Euston. Ħarist lejn waħda mill-ewwel tabelli li rajt quddiemi u ħassejt dehxa ta' ferħ li ftit tħoss bħalhom.

Fl-aħħar qiegħed hawn.

* * *

Dakinhar, is-Sibt 28 ta' Ottubru, kien il-jum uffiċjali tal-Ferħ Tant Mistenni. Qomt filgħodu b'daħka minn widna sa widna, kont qisni pjanu, sitta u tletin sinna (jew kemm għandi) jidhru kollha kemm huma. Ħadt breakfast ħafif u nħsilt, bqajt insaffar nofsiegħa sħaħ sakemm beda jaqbeż id-demm mix-xoffa ta' isfel, u naħseb li qażżiżt il-blokk ta' Ainsdale kollu.

Tlaqna fil-ħdax ta' filgħodu flok morna l-Camden Market, li konna ser inħalluh għall-Ħadd.

* * *

It-tempju l-ġdid jinsab f'żona magħrufa bħala Ashburton Grove. Tempju li sewa €400 miljun, għalkemm naħseb li kull ċenteżmu intefaq tajjeb. Morna niġbru l-biljetti. Il-mara li kien hemm mal-counter, dħulija u dejjem tidħak, talbitni "a form of identification, Mr Flask..."

Jonny infaqa' jidħak bija malli sema dik il-Mr Flask. "Mr. Flask? Qisha qed titnejjek bik qalthielek..." Dak il-ħin ftakart li kellu oħtu u m'għedtlu xejn.

Dorna ftit mal-post. Rajna t-tempju l-antik, li minn ġewwa qed jitwaqqa' biex jagħmel lok għal bini ta' appartamenti. Bejn iż-żewġ tempji hemm żona residenzjali, li issa drat tiltaqa' mal-ħerba li tħalli folla ta' 30,000 pellegrin (li issa saret 60,000) kull nhar ta' Sibt waranofsinhar.

Il-pellegrini tagħna kollha lebsin l-aħmar, bil-kmiem bojod, bħall-ikoni tagħna. Għandna bokka bil-kuluri, bit-tempju l-ġdid, bil-Franċiż ix-xiħ u bil-Franċiż ta' quddiem, u issa anke bl-iSpanjol. U llum se nuruhom, lil dawk tal-qiegħ ta' Liverpool (dawk lebsin il-blu biex niftiehmu), x'insarrfu.

Din l-esperjenza mistika li ser nitħaddet dwarha m'hijiex mawra lejn Lourdes jew laqgħa mad-Dalai Lama jew setet oħra. Ir-reliġjon tiegħi, għal dawn l-erbgħa siegħat, hija l-football. It-tempju huwa l-Emirates Stadium, ftit bogħod mit-tempju l-antik ta' Highbury, u ġejna naraw lil Henry u sħabu. Illejla, Arsenal-Everton tibda fit-tlieta ta' wara nofsinhar.

Dorna mal-bini kbir ta' l-istadium il-ġdid u ġbidna erba' ritratti kif imiss. Dħalna ġol-kumpless ta' l-Emirates għall-ħin tas-siegħa. Tlajna t-taraġ bilmod, konna minn ta' l-ewwel. It-taraġ spiċċa u dħalna fil-bieb immarkat "Green Ring M". Ftaħt il-bieb u għajnejja ferħu. U bil-mod il-mod il-ferħ infirex ġo fija. Jonny, li lanqas jinteressaħ il-ballun hux kwadru jew ovali, ukoll baqa' imbellaħ. Ħarist lejn il-ġmiel ta' xena quddiemi. Meta jimtela, ħsibt, ħa jkun anke isbaħ.

Inżilna isfel naraw il-logħba tac-Chelsea mas-Sheffield United. Kien hemm wieħed ħdejna, pellegrin kbir u oħxon li fetaħ ħalqu darbtejn, biex jidgħi: is-Sheffield tilfu penalty, u kwarta wara skorjaw ic-Chelsea.

Ma domniex naraw wisq, erġajna morna nieħdu postna biex naraw il-logħba. Mas-sagħtejn bdew iċ-ċaqliqiet fil-pitch: Ħarġu l-goalers ta' l-Everton jagħmlu l-warming up. Ċapċip ħafif minn nies li kienu qed jimlew l-Emirates. Wara ftit ħareġ Manuel Almunia, is-second goaler tagħna, u anke Jens Lehmann. Ċapċip, aktar qawwi did-darba.

L-Everton ħarġu jagħmlu warming up, taħt il-lasta tagħna. Bdejt nagħraf xi uħud minnhom, u b'hekk lil Jon stajt infiehmu min huma Cahill, Arteta, Johnson, Phil Neville, Tim Howard u Alan Stubbs.

Malli ħarġu ta' l-Arsenal għall-warming up qam l-applaws tal-folla. Bdejt nagħrafhom mill-bogħod: l-ewwel wieħed kien Pat Rice, assistent ta' Wenger. Imbagħad il-players: Henry, Rosicky, Gilberto, Hleb u van Persie (il-favoriti tiegħi), Gallas, Fabregas u Toure (favoriti tal-folla wkoll), Hoyte u Djourou. Ftit 'il bogħod minnhom kien hemm il-ħamsa li kienu se jibdew fuq il-bank: Senderos, Flamini, Aliadiere, u Walcott.

Minn fejn konna bdejna naraw ċar ħafna. Qisek qiegħed f'cinema kbir, saħansitra tara l-players jitkellmu bejniethom. U taħtna bdejna naraw anke s-supporters ta' l-Everton, jieħdu b'idejn il-mascot tagħna.

Ħdejja poġġa wieħed bit-t shirt ta' l-Arsenal ta' sentejn ilu, l-aħħar waħda li ħarġet bl-aħmar modern bil-logo ta' l-O2. Kellu il-kitba 'God' u n-numru għaxra fuq wara, wisq probabbli għal Dennis Bergkamp, li hawnhekk baqa' idolu maħbub, kważi adorat.

L-atmosfera. Xbajt nisma' din il-frażi dwar l-atmosfera fil-grawnds Ingliżi. L-ewwel ħaġa kemmxejn stramba li nnutajt kienet li konna ser nibdew naraw logħba mingħajr 'l-għajnuna' tal-kummentarju. U wara ftit għedt lanqas replays, mela aħjar niftaħ par għajnejn daqs dinja.

Ħareġ ir-referee, Alan Wiley, il-linesmen, il-coaches (Wenger, milqugħ minn applawsi kbar, u Moyes, kważi injorat totalment). Il-PA System ħabbar iż-żewġ skwadri: u l-aktar wieħed li qala' tisfir kien Philip Neville, li kien jilgħab mal-Manchester United u ma tantx huwa għal qalbna.

It-tlieta neqsin ħamsa, u jien mejjet biex tibda l-logħba. Iż-żewġ teams neħħew it-track suits, ingħaqdu f'linja twila ħdejn nofs il-ground, ħadu b'idej xulxin u ħadu posthom fil-pitch.

Il-lasta ta' l-Arsenal kienet taħtna. Jens Lehmann beda jagħmel il-warmup ta' malajr. Kori tas-supporters ma jaqtgħu xejn. Tweġiba dgħajfa ta' l-Everton, tisfir minn ta' l-Arsenal, u aktar kori tal-Gunners. Toure ġie taħtna, ċapċap tnejn ħfief lis-supporters u dawn irrispondew b'aktar ċapċip.

Wiley poġġa s-suffara ma' ħalqu u beda l-ispettaklu.

U bdew. Ġirja ta' Van Persie, xutt barra. Rosicky, barra. Arteta, foul fuq Gallas u karta safra lit-tnejn li huma. Kont għadni qed niġbed ritratt waqt corner ta' l-Everton. Neħħejt il-camera minn ma' wiċċi u nara l-impossibbli: Cahill imiss il-ballun b'rasu, jitilfu, jinżel fuq siequ u minn quddiem Lehmann sparah ġewwa, fir-rokna tax-xibka fejn lanqas 3 goalers ma kienu ser jilqgħuh.

Jonny ġibed waħda ħafifa u jien waħda ħoxna. U minn hemmhekk ħadtha qatta bla ħabel kontra l-Everton (tal-Marsa, bdejt ngħajtilhom).

Il-logħba kompliet. Dejjem Rosicky, Henry, Hleb u van Persie l-aktar attivi, idawru l-ballun iżda jidħlu fil-kaxxa mingħajr ma jkollhom mod kif jixxuttjaw fil-lasta. Henry kien diżappuntanti.

Ippruvaw kemm setgħu, imma daħlu fil-half time minn taħt. Mort nagħmel pipi ta' malajr (domt kwarta sakemm dħalt u ħriġt) u erġajt sibt posti. Mar jagħmel pipi Jonny u sakemm ġie kien beda t-tieni half. L-Arsenal qed jattakkaw taħtna, did-darba.

U l-pressjoni baqgħet iżżid. Jonny kien għadu lanqas poġġa, Henry kellu daqqa ta' ras minn taħt Howard eżatt, u dan irnexxielu jilqgħu. Bqajt b'ħalqi miftuħ bħal nofs l-istadium: ħadd ma ried jemmen. Jonny kważi tilef il-kolp u kien ser jirfes lil God.

...ikompli

Camden Town (4)

Qomt ftit għajjien illum.

Qabel il-pizza ta' Shoreditch konna ġrejna ftit jien u Jonny, madwar Londra. Tottenham Court Road, Regent Street, waqafna Starbucks, rajna Soho, u bini li kellu l-bandiera Nazzjonalista fuq il-bejt. Xtaqt immur niltaqa' mas-sid, li skond ma tgħid il-leġġenda huwa ċertu wieħed Neil. Imma Jon ippuntali lejn il-bieb u x'ħin rajt ħafna rġiel marsusin ma' xulxin intbaħt li aħjar inkomplu l-mixja tagħna. U qtajt xewqti li mmorru Denmark Street, fl-aħħar.

Il-muskoli tan-nofs t'isfel ta' ġismi kienu qishom ġejjin mill-gwerra tal-Boeri. Ħriġt fid-disgħa ta' filgħodu, xtrajt pakkett bacon u xi ftit imbarazz ieħor minn Sainsbury's. Għamilt breakfast daqsxejn tqil. Ħadt shower daqsxejn sħuna. Barra kienet ġurnata daqsxejn sabiħa.

* * *

Inżilt mit-tube f'Hyde Park Corner. Imxejt wara s-signs li juruk ill-postijiet ta' interess f'Londra. Suwed, b'tipa bajda, bożja, issibhom aħjar minn raġġ ta' tama meta tkun maqbud f'tunnel.

Imxejt bil-kwiet lejn Hyde Park. Lanqas tani li nqabbad sigarett. Hawnhekk, f'din il-medda ta' art ġganteska, issib il-paċi miegħek innifsek u man-natura. Sakemm tkun miexi f'nofs il-papri u titħaddet mal-mijiet ta' squirrels jiġġerrew madwar dan il-monument tan-natura. Poġġejt bilqiegħda fuq bank inħares lejn is-siġar. U striħajt. Għajni għal ftit marritx bija. Imn'alla kien hemm żewġ Taljani fuq il-bank ta' ħdejja li żammew il-leħen irritanti tagħhom jasal għal widnejja, u fil-kurituri ta' moħħi.

* * *

Għadni ġej minn Buckingham, palazz li lanqas jibda mas-sbuħija tal-House of Commons. Hemmhekk rajt il-famuża Change of the Guard, simbolu skabruż ta' l-imperjaliżmu Ingliż, u tiġini dehxa meta naħseb li avveniment bħal dan huwa attrazzjoni għal turisti u mhux. Il-God Save the Queen, u dik il-linja li tant ma naħmilx, speċjalment fi żmien il-World Cup... "Send them victorious..." Xi ħadd messu jfakkarhom li l-kruċjati spiċċaw, u Napuljun ilu mejjet.

Għalfejn mort Buckingham mela? Ma nafx. Id-darba li jmiss mhux se nerġa nieħu dik il-mixja kollha. Żgur mhux forsi.

* * *

"I am the son
and the heir
of a shyness that is criminally vulgar
I am the son and heir
of nothing in particular"

Morrissey. Philip f****n Morrissey. Il-ħdura deċiża ta' dik in-Nothing in Particular baqgħet f'moħħi matul il-mixja f'High Street, Camden, fejn qed niġġerra mat-triq inħares lejn il-ħwienet. Qisni tifel żgħir li xjaħ kmieni, u bqajt miexi sakemm wasalt il-Fopp, ħanut tad-diski magħmul għal min il-mużika jaf jismagħha, u jikolha.

Hawnhekk jekk titlobhom l-album tas-Smiths fejn hemm How Soon is Now kważi jibdew jitnellħu bik. Ħalliha li l-albums tan-Nine Inch Nails kienu spiċċaw, għallinqas sibt xi ħaġa għal snieni. Xtrajt Piece by Piece ta' Katie Melua, u ġibt ukoll Live at Earl's Court - ta' Morrissey appuntu.

Filgħaxija morna nduru Camden erġajna. Jonny kien għajjien u qbadna karozza tal-linja flok nerġgħu nieklu mixja kbira. Hekk jew hekk, bl-Oyster Card tiġik irħisa. Morna f'bar Kuban, fejn għaddejna ħafna mill-ħin inħarsu lejn xulxin, għajjenin mejtin, u jien qgħadt nirrispondi l-muntanja messaġġi li bdew ġejjin minn Malta.

Illum irqadt kemmxejn inkwetat. Ma nafx għala. Hekk jew hekk, is-sufan ta' Jonny tant kien komdu li nessieni dak kollu li kien qed idur f'moħħi. Anke leħen dawk iż-żewġ Taljani.

(...ikompli)

Camden Town (3)

"How good to see you!" Laura għandha parentela Ingliża. Għaliha, il-ħajja ta' kuljum, l-ewwel f'Islington imbagħad f'Camden, qatt ma kienet iebsa wisq. Drat mill-ewwel, telgħet Londra u sabet taħdem lejn in-naħat ta' Fulham, fin-nofsinhar ta' Londra.

Ironikament, Laura hija hairdresser li toħroġ ma' wieħed li għandu xagħar inqas minni.

* * *

Il-kontradizzjonijiet ta' Camden, bħalma huma xogħol Laura u xagħar Jonny, tidrahom wara ftit minuti. Filgħaxija morna nieklu f'ristorant jismu The Lock. Jinsab f'żona kemmxejn mudlama, ħdejn pont li jagħti fuq kanal fejn l-ilma kien baxx ħafna.

"Hawnehekk jgħidulu l-Camden Lock. Toqgħod naqra attent hawnhekk filgħaxija. Imma l-ikel ta' l-ost*a." Ħadna ikla laħam minn dawk li tibqa' tiftakarhom. Ħriġna tard mir-ristorant, qabditna ħafna xita u riħ kiefer.

Fit-triq lura għaddejna minn ħdejn il-Jazz Cafe. Kuljum ikun hemm xi artist jew ieħor, dakinhar, inzerta, kien hemm il-favoriti tagħna t-tlieta - il-Jamiroquai. Kulma rajna kien it-tour bus enormi tagħhom. Biljetti ma ssib imkien, speċjalment għax kien qed jirrekordja kunċert qasir, nofsiegħa kollox, għall-programm tal-BBC jismu Electric Proms.

F'xita nieżla ma taqta xejn, wasalna lura l-appartament. Laura daħlet toroq kważi mill-ewwel.

Jien qbadt ftit il-mappa ta' l-Underground, u fittixt post fejn nista' nieqaf. Jonny qalli nista' nibqa' nieżel dritt sa l-istazzjon jisimha Embankment u għandi nofs ta'nhar kollu tiegħi.

* * *

Bonġu, Camden. Bonġu Ingilterra. Qomt fit-tmienja ta' filgħodu, għamilt toast bil-butir u l-ġobon, u daqsxejn perżut (minn ta' Sainsbury's, s'intendi).

Jon u Laura kienu ilhom imqajmin imma mank jagħmlu ħoss. Kulma smajt kienu xi passi l'hinn u 'hawn mill-kamra tal-banju. Jonny kien trankwill u kalm, daqsxejn bħas-soltu. Ħeles xi xogħol li kellu jagħmel, giddem biċċa toast u fid-disgħa ta' filgħodu qabad triqtu lejn Holborn.

Ċans ninħasel, ilbist il-ġakketta tal-ġilda s-sewda u tlaqt lejn Mornington. Tal-gażżetti kien hemm, imeċlaq xi ħaġa, ħarstu l'isfel bħal wieħed li min jaf x'qed jaqra, jew jipprova jifhem. Naħseb kellu l-manwali tal-manjieri ta' Oxford miftuħ quddiemu.

* * *

Inżilt Embankment, fil-qalb ta' Londra. U beda nofs ta' nhar twil. Trafalgar Square. Issegwi s-sinjali u wara ftit (kilometri) tasal Tower of London. Big Ben. House of Commons. Suldati u pulizija armati b'machine guns awtomatiċi. Xogħlijiet fit-triq. Turisti Ġappuniżi jużaw il-Fuji u n-Nikon biex jieħdu ritratt lil dak kollu li ma jiċċaqlaqx. Imxejt ftit aktar 'il fuq, lejn ix-xmara Thames, u waqaft nieħu sigarett fil-Victoria Tower Garden. Tfal ta' l-iskola jiġru, ftit bogħod minnhom kien hemm żewġ businessmen bilqiegħda fuq bank sod ta' l-injam, laptop u financial Times f'idejhom, għaddejjin għall-affari tagħhom mingħajr ma jħarsu lejn xulxin.

Qsamt ix-xmara minn fuq Beacham Bridge. Ġbidt erba' ritratti u mxejt lejn il-London Eye. Malli wasalt ħdejn il-Hotel Marriott waqaft nixtri biljett għall-eżibizzjoni tad-Dali. U mbagħad kompliet il-mixja madwar Londra. Fost mijiet ta' nies jistennew biex jitilgħu fuq il-London Eye u għexieren ta' tfal jiġru wara xulxin fil-ġnien ta' taħtha.

Ċempilt lil Gilbert. Kien qed iżarma biex jitlaq lura lejn Malta wara 3 xhur f'Londra. Naħseb li xi ftit spiċċa biex ħass in-nuqqas ta' Malta.

* * *

Fl-erbgħa ta' wara nofsinhar kont bilqiegħda l-Camden Kitchen, dahri lejn il-kċina u l-bar. Kien hemm żewġ waitresses dak il-ħin. Waħda qsajra, bjonda, mhux partikolarment ħelwa u wiċċha naqa mpaħpaħ. Titkellem b'aċċent stramb, kważi qerriedi. L-ewwel ħaġa li għamlet kienet li tiskuża ruħha għax damet ma ġiet biex tieħu l-ordni. Ma ġara xejn.

L-oħra kienet ħafna aktar stramba. Ma tantx titbissem, kemm kemm tħares lejk u tarmalek il-mejda mingħajr ma tgħidlek kelma.

Frixt il-Gazzetta dello Sport fuq il-mejda u ordnajt Peroni. Taljan, bdew jaħsbu l-għaxra min-nies li kien għad hemm fil-post dak il-ħin. U hemmhekk intfajt naqra dwar is-semi kriżi tal-Milan, il-kampjonat li ser jirbaħ (li kellu jirbaħ) Vale Rossi, u dwar id-dubji tattiċi ta' Spalletti.

* * *

Wara mixja minn dawk it-twal nett fiċ-ċentru ta' Londra, ma jkollok aptit xejn aktar minn ikla tajba. Spiċċajna Shoreditch, naħa daqsxejn posh ta' Londra (mhux daqs Chelsea, imma dejjem differenti minn Camden). Ħadna pizza f'ristorant li jsajjar ikel Taljan tajjeb, jismu The Furnace. Skond Jonny, Shoreditch huwa l-post fejn taqa' l-intelliġenzja u l-psewdo-intelliġenzja ta' Londra.

Skond preġudizzju bażiku tiegħi, ħafna minn dawn in-nies ikunu għadhom żgħar fl-eta u jkunu għaddew parti twila minn ħajjithom jaqraw il-kotba ta' Coelho, u jippruvaw, mingħajr tama ta' suċċess, japplikaw il-ħsibijiet tiegħu għall-ħajja mgħaġġla tagħhom.

Imxejna barra mill-Furnace u morna nieħdu l-aħħar birra tal-ġurnata f'bar li ma nistax niftakar x'jismu. Malli dħalna, Jonny dar fuqi u qalli 'hawnhekk qisu Gigi's...'

Gigi's. Dak il-ghetto għall-fighetta ta' Malta, fi Spinola. Għallinqas hawnhekk, f'Shoreditch, semgħu b'Coelho.

Camden Town (2)

L-aħħar darba li rajt lil Jonny kien meta niżel Malta fl-aħħar ġimgħa t'April. Dak iż-żmien inzerta kont ser nitlaq mill-post tax-xogħol li kelli qabel, u ħabat tajjeb għax konna ltqajna spiss dik il-ġimgħa. It-Tlieta niftakar konna morna nixorbu l-inbid b'xejn il-Birgu, f'xi avveniment minn dawk li kulħadd iħobb jitbassas fih, organiżżat minn Camilleri Wines. U l-Ħamis filgħaxija kienet il-ġurnata tal-farewell.

Jonny dejjem kien wieħed minn dawk in-nies li nżommhom għal qalbi ħafna. Dejjem kont niftakru bħala bniedem attiv, ħabib ta' veru, idaħħak anke meta jeqred. Designer bħalu ftit issib. U avventuruż. Qabad kollox u telaq mat-tfajla tiegħu lejn Londra. Issa qed jgħix f'Camden, jaħdem full time f'aġenzija ġewwa Holborn u jidher li sab it-triq tiegħu. Iddispjaċini ħafna meta kienet telaq. Imma naħseb li d-dispjaċir aktar kien ġej minħabba li kont se nitilfu jien, milli għax kien ser jitlef xi ħaġa hu.

"Flasker!" Dak il-laqam kien qalagħhuli, imma għad-designers biss, Tony Galea. U baqa hemm, avolja kultant Alessandro kien jivvinta xi derivattiv (Flaskegno, Flaskao, Gigio Flask etc).

Għannaqt lil Jonny. "Nice to see, man." Meta tkun Londra, titkellem bħalhom. U bdejna.

Kif int? Kif sejjer? Tidher li tlaqt mill-JP... tidher kuntent! Wenza kif inhi? Sabiħ dal-post...

Dorna l-kantuniera u morna Sainsbury's. Għamilna xirja ta' malajr: żewġ pakketti tortellini, tiġieġ imqatta', zalza tal-curry, coke, xi biċċa mbarazz żgħira u pakkett Superkings. Ħallasna lil kaxxiera u rħejnilha lejn l-appartament ta' Jonny.

Fi kċina żgħira, ħareġ l-ewwel platt tal-mawra tiegħi f'Londra: ross bit-tiġieġ u l-curry, platt li niżel għasel ħafna aktar mill-annimal (ma stajtx intiehmu sew) bil-fażola msajra li tawna fuq l-Airmalta. Ħadna Stella Artois kull wieħed u Jonny reġa telaq lejn ix-xogħol.

Jien imteddejt fuq is-sufan, xgħelt it-TV u ħadt nagħsa ħafifa sakemm ITV 2 beda juri sitcoms Amerikani bħal Home Improvements, Joey, u saħansitra Happy Days.

* * *

Qomt qisni f'ġenna ta' l-art. Il-vaganza bdiet. Mas-sitta jien u Johnny tlaqna 'l barra.

Camden. Il-belt tal-kuluri, tal-bankini wiesa' fejn tara ħwienet li jbiegħu minn kollox lil kulħadd f'kull ħin. Belt affezzjonata mal-punk tar-Ramones u tal-Clash, fejn hemm ħwienet tal-ġilda bieb ma' bieb ma' xulxin, u pushers tas-smoke iduru miegħek bl-aktar prezzijiet vantaġġjużi. Hawn kollox f'dil-belt. Saħansitra daqsxejn arja.

Morna nieħdu birra oħra f'lokal jismu World's End, fejn jiltaqgħu ħafna żgħażagħ wara x-xogħol. Punks jitħalltu ma' dawk ta' l-ingravata. Jien u Jonny intfajna fis-sular ta' fuq nieħdu birra sakemm tiġi Laura mix-xogħol.

Did-darba d-diskors dar fuq il-JP. Lil Jonny sirt nafu minn hemm. Tlaqna t-tnejn li aħna minħabba l-istess raġuni: paga baxxa, ħajja iebsa. Il-ħajja ta' dik il-kumpanija nbidlet ftit, u forsi mhux għall-aħjar, imma tiegħi u ta' Jonny inbidlet mhux ħażin. Għall-aħjar.

Il-mara kif inhi? Staqsieni Jonny.
"Żomm naqa ħa nkellem daqsxejn lil tiegħek," għidtlu b'nofs daħka. Laura kienet għadha kif waslet mix-xogħol.

(...ikompli)

Camden Town (1)

Il-lejl ta' qabel kont domt ftit biex nasal id-dar. Kelli ntir fis-sebgħa ta' filgħodu u ma hemm xejn agħar, għalija, minn titjira fuq stonku vojt u raqda qasira.

Lejn Heathrow, Sako u Martin kienu ħafna aktar lura minni u ma kellix ma' min ngħid kelma. Xtrajt l'Espresso u ma ftaħtux; ħallejtu fil-bagalja u fuq l-ajruplan qgħadt naqra t-Times. Ħdejja inzertajt Malti li kien qed jaqra xi gażżetta finanzjarja bil-Franċiż, u dan il-Malti, li jaħdem id-Deloitte, kellimni biss lejn l-aħħar tat-titjira x'ħin fehem li t-temperatura kienet ta' ħdax-il grad biss u għaddiet dehxa fost kull min kien bilqiegħda.

Żewġ bagalji, u kif jgħid il-Malti, xkora dagħa. Ħallejt lil Sako u lil Tinu qabel ma nżilt lejn l-arrivals. Dawk kienu sejrin Valencia jaraw lil Valentino Rossi; jien kont sejjer Londra nara lil Thierry Henry.

Minn Heathrow niftakar l-istorbju ġenerali u d-daqsxejn ta' panik moħbi li kelli biex nara kif jaħdem it-tube. Imma Londra mhux bħal Ruma, jekk timxi wara s-sinjali taf li se tasal. U żammejt f'rasi dak li qalli Jonny: Inżel Leicester Square, minn hemm aqbad is-sewda lejn Mornington Crescent. U tmurx lejn Morden. Morden le, le, u le. Bil-biża li nispiċċa f'xi raħal fil-qiegħ ta' Wales, inżilt lejn l-Underground, xtrajt Single Trip (£4) u qbadt it-tube il-blu tal-Piccadilly Line.

Poġġejt kollox ħdejja, bilqiegħda kkakmat kif kont ħriġt l-Espresso minn postu u bdejt naqra din il-pubblikazzjoni anti-Berluskonjana. F'nofs Londra tqattar bix-xita u sħab ma' kullimkien, lanqas indunajt li kelli n-nuċċali tax-xemx f'għajnejja.

Wara l-ewwel stop telgħet waħda Maltija li taħdem il-Kummissjoni, bieb ma' bieb magħna. Naħseb għarfitni imma ma kellmitnix, bħal meta taqbdek dik il-mistħija ħafifa u tagħżel li ma tkellimx nies li ma tafhomx wisq.

Tube tipiku ta' Londra: żewġ indjani jħarsu fil-vojt u ma jitkellmux. Ingliż pulit sejjer lejn ix-xogħol jaqra l-gażżetta. Zgħażagħ u visibilju iPods. Ingliż ieħor naqa inqas pulit b'saqajh imferrxin mal-kuridur, eżatt kemm kemm ma jkun jista' jgħaddi ħadd.

Tal-kummissjoni niżlet fil-kwiet, bil-mobile f'idejha. L-Ingliż ta' saqajh twal waqaf Knightsbridge, qam nofs minuta qabel ma waqfet il-ferrovija u qagħad isaffar, għall-affari tiegħu. Wara ftit sekondi ndunajt li kien qed isaffar Love Will Tear us Apart. Ħeqq, hawnhekk f'pajjiżhom qiegħed.

Inżilt Leicester Square, għall-grazzja t'Alla ma tantx sibt nies. Kelli nitla t-taraġ bil-bagalji u ma tantx bdew jieħdu gost minħabba t-tisbit. Bdejt inħoss bard u sħanat f'daqqa; minħabba l-kurrent ta' arja li jgħaddi minn kuridur għall-ieħor ta' l-istazzjon. Flejt ftit il-mappa li kelli f'idi, u lmaħtha, xi ħames waqfiet il-bogħod: Mornington Crescent.

Din id-darba ma ħriġtx l Espresso, bqajt bilwieqfa mal-bagalji, hekk jew hekk m'hawnx skossi.

Wasalt, inżilt b'naqa ta' skariġġ, u lestejt ruħi biex niffaċċja taraġ ieħor. Fittixt il-lift, sibtu, u rajt li se jdum u kien hemm nies mhux ħażin. Għedt aħjar nieħu t-taraġ. U x'ħin wasalt indunajt għalfejn kien hemm lift. Sinjal, iswed fuq isfar, jgħidlek: 'This staircase has 84 steps.' Did-darba ħassejt vampa sħana u mort lura lejn il-lift.

Tlajt fuq, ħriġt mill-istazzjon. Sibt wieħed tal-gażżetti. "You have cigarettes?" Dak bilkemm ħares lejja, għamel ħoss b'ħalqu biex jgħidli le, u xengel kemmxejn rasu. Wara ftit minuti tfaċċa, bħall-manna mis-sema, liebes ġakketta tal-jeans u xalla m'għonqu, il-ħabib ta' dejjem Jon Calleja.

(... ikompli)